Blog

انسانی رویّوں کی سب سے پیچیدہ حقیقت یہ ہے کہ ہر وہ شخص جو ہمارے سامنے مسکراتا ہے، ضروری نہیں کہ ہمارے لیے اچھا بھی سوچتا ہو۔ کچھ لوگ تعلقات کو خلوص سے نبھاتے ہیں، جبکہ کچھ لوگ اپنے مفاد کے لیے اپنائیت کا لباس اوڑھ لیتے ہیں۔ اُن کے الفاظ میں محبت، لہجے میں مٹھاس اور رویّے میں قربت دکھائی دیتی ہے، لیکن جیسے ہی اُن کا مقصد پورا ہوتا ہے، اُن کے انداز بدلنے لگتے ہیں۔یہ حقیقت بھی سمجھنے کے قابل ہے کہ منافقت ہمیشہ نفرت کی صورت میں سامنے نہیں آتی۔ کبھی یہ تعریف کے اندر چھپی ہوتی ہے، کبھی خیرخواہی کے مشورے میں اور کبھی ایسے سوالات میں جن کا مقصد آپ کی بہتری نہیں بلکہ آپ کی کمزوریوں کو جاننا ہوتا ہے۔ اسی لیے زندگی میں صرف الفاظ کی بنیاد پر کسی کو اپنا سمجھ لینا عقلمندی نہیں۔ انسان کو اُس کے مستقل رویّے، مشکل وقت میں اُس کے کردار اور دوسروں کی غیر موجودگی میں اُس کی گفتگو سے پہچاننا چاہیے۔لیکن ہر شخص پر شک کرنا بھی عقل مندی نہیں۔ اگر ہم چند تلخ تجربات کی وجہ سے سب کو ایک ہی نظر سے دیکھنے لگیں تو اپنے لیے خلوص رکھنے والے لوگوں کو بھی خود سے دور کر دیں گے۔ بہترین راستہ یہ ہے کہ دل میں نرمی رکھی جائے، مگر فیصلوں میں سمجھ داری اختیار کی جائے۔ اعتماد ضرور کریں، لیکن اتنا کہ کسی کی حقیقت سامنے آنے پر آپ کا اپنا وجود گم نہ ہو جائے۔زندگی ہمیں یہ سکھاتی ہے کہ ہر تعلق کو نام دینا ضروری نہیں، لیکن ہر تعلق کی حقیقت سمجھنا ضروری ہے۔ بعض اوقات خاموشی سے لوگوں کو پرکھنا، اُن کے دعووں پر یقین کرنے سے زیادہ فائدہ مند ثابت ہوتا ہے۔ چہرے دیکھ کر تعلق نہ بنائیں، کردار دیکھ کر اعتماد کریں کیونکہ الفاظ وقتی طور پر دل جیت سکتے ہیں، مگر حقیقت ہمیشہ رویّوں سے ظاہر ہوتی ہے۔

خاک زادہ

انسان کی فطرت بھی عجیب ہے۔ جو چیز آسانی سے میسر ہو، اُس کی اہمیت کم محسوس ہونے لگتی ہے، اور جو چیز ہاتھ سے نکل جائے، اُس کی کمی شدت سے محسوس ہوتی ہے۔ یہی وجہ ہے کہ بعض لوگوں کو کسی کی اہمیت اُس کے چلے جانے کے بعد سمجھ آتی ہے۔ پھر یادیں باقی رہ جاتی ہیں، مگر اُن یادوں کو حقیقت میں بدلنے کا موقع ہاتھ سے نکل جاتا ہے۔اصل سمجھ داری یہ نہیں کہ کسی کے چلے جانے کے بعد اُس کی خوبیاں گنی جائیں، بلکہ یہ ہے کہ اُس کی موجودگی میں اُس کی قدر کی جائے۔رشتے میں محبت صرف خوب صورت الفاظ کہنے کا نام نہیں، بلکہ کسی کے احساسات کو سمجھنے، اُس کی بات سننے اور اُس کی موجودگی کو اہمیت دینے کا نام ہے۔یاد رکھیے، ہر خاموش انسان بے حس نہیں ہوتا اور ہر برداشت کرنے والا ہمیشہ برداشت نہیں کرتا۔ بعض اوقات لوگ شکایت کرنا چھوڑ دیتے ہیں، کیونکہ وہ سمجھ جاتے ہیں کہ اُن کے احساسات کی وضاحت اب بے معنی ہے۔ جب کوئی شخص دل سے دور ہو جائے تو اُس کی واپسی ممکن بھی ہو، مگر پہلے جیسا تعلق ہمیشہ واپس نہیں آتا۔لوگوں کی قدر اُن کے بچھڑنے کے بعد نہیں، اُن کی موجودگی میں کرنا سیکھیں، کیونکہ بعض کمیوں کا احساس اُس وقت ہوتا ہے جب اُنہیں پورا کرنے کا کوئی راستہ باقی نہیں رہتا۔

خاک زادہ

ہم ایک ایسے دور میں سانپ اور سیڑھی کا کھیل کھیل رہے ہیں جہاں انسانی رویوں کی گہرائی بلکل ہی ختم ہو چکی ہے۔ لوگ دلوں کے بجائے دماغ سے رشتوں کو نبھاتے ہیں اور یہی ہمارے دور کا سب سے بڑی حقیقت ہے۔ ہم نے لفظوں کی خوبصورتی کے پیچھے خلوص کو ہمیشہ کے لئے دفن کر دیا ہے۔ چہروں پر مصنوعی مسکراہٹ اور دل میں حسد کا زہر رکھنا اب ایک روایتی عمل بن چکا ہے۔​ہمارے رویوں کی سب سے بڑی تلخی یہ ہے کہ ہم دوسروں کی مجبوریوں کو انہی کا قصور سمجھتے ہیں۔ جب کوئی شخص گرے تو اسے سنبھالنے کے بجائے اس کی گرنے کی وجہ پر بات کرنا، اور اس کی بے بسی کو گفتگو کا موضوع بنانا ہمارا پسندیدہ عمل بن چکا ہے۔ ہم ہمدردی کا مظاہرہ صرف وہاں کرتے ہیں جہاں سے ہمیں مستقبل میں کسی فائدے یا تعریف کی توقع ہوتی ہے۔ بغیر کسی غرض کے کسی کے کام آنا اب ایک نایاب خصوصیت بن کر رہ گئی ہے۔ہماری اس پسماندہ سوچ کا عکس ہمارے گھروں اور تعلقات پر بھی صاف نظر آتا ہے۔ سچے انسان کو بیوقوف اور چالاک شخص کو عقلمند سمجھا جاتا ہے۔ تنقید ہمارا پیشہ بن چکا ہے اور تعریف میں ہمارا دل سکر جاتا ہے۔ جب تک ہم رویوں کی اس منافقت کو تسلیم کر کے اپنے رویوں میں نرمی، سچائی اور خلوص شامل نہیں کریں گے، تب تک ہمارا معاشرہ ایسے ہی اندر سے کھوکھلا ہوتا رہے گا۔

خاک زادہ

آج کا انسانی معاشرہ ترقی کی راہوں پر زور و شور سے گامزن ہے، لیکن اخلاقی اور روحانی طور پر بہت زیادہ زوال کا شکار ہے۔ ہمارے ماحول کی سب سے تلخ حقیقت یہ ہے کہ ہم نے انسان کی قدر و قیمت کا معیار اس کے اخلاق کے بجائے اس کی صورت اور معاشی حیثیت کو بنا دیا ہے۔ یہ ایک ایسا خاموش عمل بن چکا ہے جہاں انسان کو نہیں بلکہ اس کی طرف سے دیے گئے منافع کو دیکھا جاتا ہے۔اس معاشرتی بگاڑ کی اصل وجہ ہمارے بدلتے ہوئے رویے ہیں۔ ہمدردی، برداشت اور اخلاص کی جگہ اب خود غرضی، منافقت اور ظاہری نمائش نے لے لی ہے۔ لوگ چہروں پر ہمدردی کا نقاب اوڑھ کر ملتے ہیں، مگر اندر سے دوسروں کی نا کام ہونے کا انتظار کر رہے ہوتے ہیں۔ ہم دوسروں کی زندگیوں میں عیب تلاش کرنے اور ان کے حالات پر بلا وجہ ججمنٹ دینے میں مہارت رکھتے ہیں، جبکہ اپنی خامیوں کو نظر انداز کر دیتے ہیں۔ احساس کا یہی زوال ہماری اجتماعیت کو تباہ کر رہا ہے۔ان رویوں کا سب سے خطرناک اثر ہمارے تعلقات اور رشتوں پر پڑا ہے۔ آج رشتوں کی بنیاد خلوص دل کے بجائے خالصتا مفاد اور ضرورت پر قائم ہو چکی ہے۔ جب تک اپنوں سے معاشی یا ذاتی فائدے کی امید رہتی ہے، رشتے قائم رہتے ہیں؛ لیکن جیسے ہی کوئی شخص مصیبت یا تنگ دستی کا شکار ہوتا ہے، خون کے رشتے بھی منہ پھیر لیتے ہیں۔ خون سے زیادہ اب پیسہ رشتوں کی نزدیکی اور دوری طے کرتا ہے۔​اگر ہم ایک بہترین اور پرسکون معاشرہ بنانا چاہیں، تو ہمیں مادیت پرستی کے اس دائرے سے باہر نکلنا ہوگا۔ رشتوں میں خلوص، رویوں میں لچک اور دلوں میں دوسروں کے لیے وسعت پیدا کرنا ہی اس تلخی کو مٹانے کا واحد حل ہے۔

خاک زادہ

معاشرے میں سب سے عام اور سب سے خطرناک رویوں میں سے ایک غیبت ہے۔ لوگ ایک دوسرے کے سامنے مسکراتے ہیں،ایک دوسرے کی تعریف کرتے ہیں، اور دوست ہونے کا مظاہرہ کرتے ہیں، مگر جیسے ہی وہ شخص وہاں سے جاتا ہے، باتیں بدل جاتی ہیں۔ اس کی خامیوں، غلطیوں، اور ذاتی معاملات پر باتیں شروع ہو جاتی ہیں۔ یہ عمل اتنا عام ہو چکا ہے کہ اب اسے محفل کا سمجھا جانے لگا ہے۔ محفلیں غیبت کے بغیر ادھوری محسوس ہوتی ہیں، اور جو شخص دوسروں کی بات نہیں کرتا اسے بورنگ قرار دے دیا جاتا ہے۔ حقیقت یہ ہے کہ غیبت صرف بات نہیں، بلکہ اعتماد کے قتل کا ایک خاموش طریقہ ہے۔ جب کسی کی پیٹھ پیچھے بات کی جاتی ہے تو اس شخص کا وقار آہستہ آہستہ کم کیا جا رہا ہوتا ہے،۔ اس عمل کا سب سے برا پہلو یہ ہے کہ یہ عمل کرنے والے کو بھی اندر سے کھوکھلا کر دیتا ہے۔ وہ شخص جو دوسروں کی خامیاں نکالتا رہتا ہے، خود کبھی اپنی طرف نہیں دیکھتا۔ وہ دوسروں کے عیب تلاش کرنے میں اتنا مصروف ہو جاتا ہے کہ اپنی خامیاں نظر نہیں آتیں۔ نتیجہ یہ نکلتا ہے کہ معاشرے میں اعتماد ختم ہو جاتا ہے، رشتے کمزور پڑ جاتے ہیں، اور لوگ ایک دوسرے سے ڈرنے لگتے ہیں۔ جو بات آج کسی اور کے بارے میں ہو رہی ہے، کل اسی محفل میں خود اس شخص کے بارے میں ہو سکتی ہے۔ غیبت کا حل صرف یہ ہے کہ انسان خود فیصلہ کرے کہ وہ اس زہر کا حصہ نہیں بنے گا۔ جو شخص دوسروں کی غیر موجودگی میں بھی ان کا احترام کرتا ہے، وہ اپنے ضمیر کے سامنے بھی مطمئن رہتا ہے اور اس کو بھی احترام دیا جاتا ہے اس کی غیر موجودگی میں۔

خاک زادہ

کبھی کبھی انسان کو دوسروں کی باتیں اتنی تکلیف نہیں دیتیں جتنی اُن لوگوں کی خاموشی اور رویّہ دکھ دیتا ہے جو اسے قریب سے جانتے ہیں۔ جن لوگوں نے آپ کے ساتھ وقت گزارا ہو، آپ کی طبیعت دیکھی ہو، آپ کی سوچ سمجھی ہو اور آپ کے مزاج کے اتار چڑھاؤ سے واقف ہوں، اُن سے کم از کم اتنی توقع ضرور ہوتی ہے کہ جب آپ کے بارے میں کوئی غلط فہمی پھیلائی جائے تو وہ حقیقت جاننے کے باوجود خاموش تماشائی نہیں بنیں گے۔مگر عجیب بات یہ ہے کہ بعض اوقات اجنبیوں سے زیادہ مایوسی اپنے ہی لوگوں سے ہوتی ہے۔ آپ کے خلاف کوئی بات شروع ہو تو وہ یہ کہنے کے بجائے کہ “نہیں، میں اسے جانتا ہوں، یہ بات اس کی طبیعت کے مطابق نہیں”، الٹا اُس گفتگو میں دو چار باتیں اپنی طرف سے بھی شامل کر دیتے ہیں۔ کبھی مذاق کے نام پر، کبھی محفل کا ساتھ دینے کے لیے اور کبھی شاید صرف اس لیے کہ اُنہیں کسی کی طرف کھڑا ہونا مشکل لگتا ہے۔ انہیں معلوم ہوتا ہے کہ حقیقت کیا ہے، مگر پھر بھی وہ حقیقت کا ساتھ دینے کے بجائے بات کو مزید رنگ دے دیتے ہیں۔شاید دکھ اس بات کا نہیں ہوتا کہ کسی نے آپ کو غلط سمجھ لیا؛ دکھ اس بات کا ہوتا ہے کہ جسے آپ نے سمجھا تھا کہ وہ آپ کو جانتا ہے، وہ بھی آپ کی وضاحت کرنے کے بجائے آپ کے بارے میں بننے والی غلط رائے میں اپنا حصہ ڈال دے۔ کیونکہ اپنوں سے ہر وقت تعریف نہیں چاہیے ہوتی، بس اتنی سی امید ہوتی ہے کہ جہاں آپ کے بارے میں غلط بات ہو رہی ہو، وہاں کم از کم وہ آپ کو غلط ثابت کرنے کے لیے نہیں بلکہ حقیقت واضح کرنے کے لیے کھڑے ہوں گے۔رشتوں کی اصل پہچان شاید ساتھ بیٹھ کر ہنسنے میں نہیں، بلکہ اُس وقت ہوتی ہے جب آپ موجود نہ ہوں اور آپ کا ذکر ہو رہا ہو۔ وہاں اگر کوئی آپ کی غیر موجودگی میں بھی آپ کی عزت، نیت اور حقیقت کا خیال رکھے، تو سمجھ لیجیے کہ وہ صرف آپ کو جانتا نہیں، سمجھتا بھی ہے۔

خاک زادہ

معاشرے میں حسد ایک ایسا رویہ ہے جو ہمیشہ چھپا رہتا ہے مگر اثر بہت گہرا ڈالتا ہے۔ لوگ کھل کر حسد کا اظہار نہیں کرتے، بلکہ اسے خاموشی سے اپنے اندر جمع کیے رکھتے ہیں۔ کسی کی کامیابی پر مسکراہٹ تو اپنے چہرے پر لے آتے ہیں، مگر اندر سے بے چین ضرور ہو جاتے ہیں۔اور ان کی یہ بے چینی بعد میں تنقید، بے رخی، اور باتوں میں تفریق،کی شکل اختیار کر لیتی ہے۔ لوگ دوسروں کی ترقی کو کہیں نہ کہیں اپنی ناکامی سمجھنے لگتے ہیں۔ اگر کوئی کامیاب ہو جائے تو اسے قسمت کا اچھا کہا جاتا ہے، لیکن اس کی محنت کا تذکرہ نہیں کیا جاتا۔ یہ رویہ اتنا عام ہو چکا ہے کہ بہت سے رشتے اسی خاموش مقابلے کی نذر ہو جاتے ہیں۔ بہن بھائی، دوست، اور یہاں تک کہ قریبی رشتے دار بھی ایک دوسرے سے مقابلہ کرنے لگتے ہیں۔ کامیابی کی خوشی کو چھپایا جاتا ہے، تاکہ حسد پیدا نہ ہو۔ نتیجہ یہ نکلتا ہے کہ لوگ اپنی کامیابیوں سے بھی پورا لطف نہیں اٹھا پاتے۔ حسد انسان کو اندر سے کھوکھلا کر دیتا ہے۔ وہ دوسروں کی زندگی دیکھ کر اپنی زندگی سے ناراض ہونے لگتا ہے۔ اس زہر سے بچنے کا واحد طریقہ یہ ہے کہ انسان اپنے آپ پر اور اپنی محنت پر توجہ دے اور دوسروں کی کامیابی کو اپنی ناکامی نہ سمجھے۔ مگر معاشرہ اس سوچ کو فروغ نہیں دیتا۔ وہ مقابلے کو قدر کی نگاہ سے دیکھتا ہے، اور حسد کو خاموشی سے قبول کر لیتا ہے۔ جو شخص اس حقیقت کو پہچان لیتا ہے، وہ کم از کم اپنے دل سے اس زہر کو نکالنے کی کوشش ضرور کرتا ہے۔

خاک زادہ

خاندان کو معاشرے میں سب سے مقدس رشتہ قرار دیا جاتا ہے، مگر حقیقت اس سے مختلف ہوتی ہے۔ بہت سے گھروں میں محبت کے نام پر کنٹرول ہوتا ہے، خیال رکھنے کے نام پر ذہنی دباؤ ہوتا ہے، اور اپنائیت کے نام پر خاموشی ہوتی ہے۔ والدین اولاد سے توقعات رکھتے ہیں جو کبھی وہ کھل کر اولاد سے بیان نہیں کی کر تے، مگر ان کی کسی بھی حوالے سے ناکامی پر مایوسی ضرور ظاہر کی جاتی ہے۔ اولاد والدین کی قربانیوں کا ذکر سنتے سنتے اس بوجھ تلے دب جاتی ہے کہ وہ کبھی اپنے خوابوں کو پورا کرنے کا سوچ بھی نہیں سکتے۔ بہن بھائیوں کے درمیان مقابلہ پیدا کر دیا جاتا ہے، کامیابی کو ایک دوسرے سے جوڑ دیا جاتا ہے، اور محبت مشروط بنا دی جاتی ہے۔ بہت سے گھروں میں باتیں تو ہوتی ہیں مگر سمجھداری نہیں ہوتی۔ لوگ ایک ہی چھت تلے رہتے ہیں مگر دل کے فاصلے بڑھتے چلے جاتے ہیں۔ تکلیف کے وقت خاموشی اختیار کر لی جاتی ہے، مسائل کو نظر انداز کر دیا جاتا ہے، اور سب کچھ ٹھیک ہونے کا ناٹک کیا جاتا ہے۔ نتیجہ یہ نکلتا ہے کہ خاندان کے افراد ایک دوسرے سے دور ہو جاتے ہیں، حالانکہ جسمانی طور پر قریب ہوتے ہیں۔ بہت سے لوگ باہر دنیا میں مسکراتے ہیں مگر گھر پہنچ کر ایک قسم کے غائب ہو جاتے ہیں۔ وہ جانتے ہیں کہ ان کے مسائل کو کوئی نہیں سمجھے گا، اس لیے وہ خاموش رہنا بہتر سمجھتے ہیں۔ حقیقی اپنائیت تب پیدا ہوتی ہے جب لوگ ایک دوسرے کی خاموشی کو بھی سمجھیں، ایک دوسرے کی کمزوری کو قبول کریں، اور بغیر کسی شرط کے ساتھ کھڑے رہیں۔ مگر ایسا خاندان نایاب سے ہو چکے ہیں۔ زیادہ تر گھروں میں محبت کا لفظ استعمال تو کیا جاتا ہے، مگر اس کا عملی روپ بہت کم نظر آتا ہے۔ جو شخص اس تلخی کو سمجھ لیتا ہے، وہ کم از کم اپنے رویے کو بدلنے کی کوشش کرتا ہے، چاہے باقی نہ بدلیں۔

خاک زادہ

انسان جب معاشرے میں قدم رکھتا ہے تو اسے آہستہ آہستہ یہ سکھایا جاتا ہے کہ اصل چہرہ دکھا کر نہیں چلنا ۔ چہرے پر مسکراہٹ لازمی ہے،لہجے میں نرمی ضروری ہے، اور اپنی تکلیف کو چھپانا بہادری سمجھا جاتا ہے۔ لوگ صبح اٹھتے ہی ایک ایسا چہرہ اپنا لیتے ہیں جو ان کا نہیں ہوتا۔ وہ باتوں میں ہنسی کو لیتے ہیں، تعریفیں کرتے ہیں، اور خوشی کا ڈھونگ رچاتے ہیں تاکہ معاشرہ انہیں قبول کرے۔ حقیقت یہ ہے کہ معاشرہ سچائی کو برداشت نہیں کرتا۔ اگر کوئی اپنی کمزوری کا اظہار کرے تو اسے کمزور کہا جاتا ہے، اگر درد اور تکلیف کا ذکر کرے تو شکوے اور شکایت کرنے والا بنا دیا جاتا ہے۔ نتیجہ یہ نکلتا ہے کہ انسان سالوں تک اداکاری کرتا رہتا ہے، یہاں تک کہ وہ خود بھی بھول جاتا ہے کہ اس کا حقیقی چہرہ کیا تھا۔ رات کی خاموشی میں جب سب سوتے ہیں اور چہرے سے ماسک اتارا جاتا ہے، تب ایک گہرا خالی پن نظر آتا ہے۔ وہ خالی پن جو جھوٹی مسکراہٹوں، جھوٹی خوشیوں اور جھوٹے تعلقات نے پیدا کیا ہوتا ہے۔ انسان اتنے لوگوں کے درمیان رہتے ہوئے بھی تنہا محسوس کرتا ہے کیونکہ اس کے اردگرد کوئی اس کی اصل پہچان تک نہیں پہنچتا۔ سب صرف ظاہری چمک دیکھتے ہیں، اندر کی ٹوٹ پھوٹ کو نہیں۔ یہ قید اتنی مضبوط ہو جاتی ہے کہ بہت سے لوگ زندگی بھر اسی جھوٹے چہرے کے ساتھ جیتے رہتے ہیں اور بلآخر مر جاتے ہیں۔ حقیقی آزادی تب ملتی ہے جب انسان فیصلہ کر لے کہ وہ اپنے حقیقی چہرے کے ساتھ رہے گا، چاہے معاشرہ اسے اگنور کر دے۔ مگر یہ فیصلہ آسان نہیں، کیونکہ سالوں کی عادت ایک رات میں نہیں بدلتی۔ انسان جب اس قید کو توڑنے کی کوشش کرتا ہے تو اسے تنہائی کا سامنا کرنا پڑتا ہے، لیکن وہ تنہائی نہیں ہوتی، بلکہ اس کی اپنی حقیقت ہوتی ہے۔ جس میں سکون ہوتا ہے، کیونکہ اب اسے کسی کے لیے اداکاری کرنے کی ضرورت نہیں ۔ معاشرہ شاید اسے عجیب سمجھے، لیکن وہ شخص کم از کم اپنے آپ سے جھوٹ نہیں بولتا۔ اور یہی سب سے بڑی آزادی ہے۔

خاک زادہ

معاشرے کی ایک تلخ حقیقت یہ بھی ہے کہ آجکل زیادہ تر رشتے محبت یا خلوص پر مبنی نہیں ہیں، بلکہ ذاتی مفاد پر قائم ہوتے ہیں۔ جب تک آپ کسی کام آتے رہیں گے، تو لوگ آپ کے قریب رہیں گے، آپ کی تعریف بھی کرتے رہیں گے، اور آپ کو اپنا بھی مان کے چلتے رہیں گے۔ لیکن جیسے ہی آپ پر کوئی مشکل وقت آئے گا، وہی لوگ خاموشی سے غائب ہو جاتے ہیں، یا پھر آپ سے فاصلہ قائم کر لیتے ہیں۔ حقیقی دوستی اور مخلص تعلق آج نایاب چیزیں بن چکی ہیں۔ اکثر تعلقات صرف لین دین کا ایک خوبصورت لباس پہنے ہوتے ہیں۔ لوگ آپ کو اس وقت تک چاہتے ہیں جب تک آپ ان کے لیے فائدہ مند رہیں۔ جیسے ہی آپ ان لوگوں کو کسی بھی طرح سے بوجھ لگنے لگے تو ان کے رویوں میں سنگین بدلاو آجاتا ہے جس سے آپ اپنے آپ کو ان لوگوں کے سامنے خود کو بوجھ سمجھنے لگتے ہیں۔ یہ تلخ حقیقت ہے کہ آج کے دور میں زیادہ تر رشتے مشروط ہوتے ہیں، بے لوث بہت کم۔

ہم ایک ایسے دور میں جی رہے ہیں جہاں انسان کی زندگی کی قیمت کسی ہسپتال کے کاؤنٹر پر جمع ہونے والے بل سے طے ہوتی ہے۔ جب کوئی حادثہ یا بیماری کسی غریب پر نازک وقت لاتی ہے، تو مسیحا کہلانے والے اداروں کی پہلی ترجیح مریض کی نبض سنبھالنا نہیں، بلکہ اس کے جیب کا جائزہ لینا ہوتی ہے۔ تڑپتے ہوئے انسان کو وینٹی لیٹر یا ادویات صرف اس لیے نہیں ملتی کیونکہ اس کے پاس کاغذ کے چند نوٹ نہیں ہوتے۔ انسان کو تڑپ تڑپ کر دم توڑتے دیکھنا اور محض کاغذی کارروائی یا پیسوں کی عدم ادائیگی پر اسے سڑک پر پھینک دینا اس معاشرے کی وہ مردہ دلی ہے جس پر روح کانپ اٹھتی ہے۔ پیسے کا یہ بت انسان کے اندر سے رحم کی آخری رمق بھی نگل چکا ہے۔

ہم ایک ایسے مالیاتی نظام اور معاشی خوف میں جکڑے ہوئے ہیں جہاں ہر انسان صرف “بقا” کی جنگ لڑ رہا ہے۔ جب انسان کا پورا دن صرف روٹی، کپڑا اور بل ادا کرنے کی فکر میں گزر جائے، تو اس کے اندر کی تخلیقی صلاحیت، اس کی سوچنے کی طاقت اور اس کے بڑے خواب آہستہ آہستہ دم توڑ دیتے ہیں۔ اس معاشرے نے انسان کو ایک مشین بنا دیا ہے جو صرف صبح اٹھتی ہے، کام کرتی ہے اور رات کو تھک کر سو جاتی ہے۔ جب معاشرے سے معاشی سکون ختم ہو جائے، تو وہاں سے ادب، فن، دانشمندی اور ایجادات کا خاتمہ بھی خود بخود ہو جاتا ہے۔

خاک زادہ

اس معاشرے کا ڈھانچہ اس طرح ترتیب دیا گیا ہے کہ قانون کی گرفت صرف اس کے لیے ہے جس کے پاس اپنا دفاع کرنے کے لیے وسائل کم ہیں یا ہیں ہی نہیں۔ ایک عام انسان سے چھوٹی سی غلطی بھی ہو جائے تو اسے اخلاقیات اور آئین کے تمام اسباق یاد دلا کر ذلیل کر دیا جاتا ہے، جبکہ بااثر طبقہ کھلم کھلا جرم کر کے بھی اسے اپنی “ذہانت” یا “حکمت عملی” کا نام دے کر نکل جاتا ہے۔ انصاف اب حق سچ کی بنیاد پر نہیں، بلکہ اس بات پر ملتا ہے کہ عدالت کے باہر آپ کی حیثیت کتنی اونچی ہے۔ اس تفریق نے عام انسان کے اندر سے قانون کا احترام اور ریاست پر اعتماد ختم کر دیا ہے

ہم ایک ایسے ماحول میں سانس لے رہے ہیں جہاں لوگ دوسرے انسانوں کے وقت، محنت اور زندگی کی کوئی قیمت نہیں سمجھتے۔ ہم دوسروں سے تو یہ توقع رکھتے ہیں کہ وہ ہمارے ایک اشارے پر حاضر ہوں، لیکن جب ان کا وقت اور طاقت ختم ہو جاتی ہے، تو ہم اسے ان کا محض فرض سمجھ کر بھول جاتے ہیں۔ کسی کی زندگی کے قیمتی سال، اس کی جوانی اور اس کے اعصاب کو استعمال کر کے بھول جانا یہاں ایک عام سی بات ہے۔ لوگ یہ بھول جاتے ہیں کہ جو وقت اور صلاحیت وہ کسی سے چھین رہے ہیں، وہ دوبارہ کبھی لوٹ کر نہیں آئے گی۔ انسان کی زوال پذیری کا آغاز تب ہوتا ہے جب وہ دوسروں کے وقت کی قدر کو پامال کرنا شروع کر دیتا ہے۔

خاک زادہ

ہمارے معاشرے نے تعلیم کو صرف ایک کاروبار اور ڈگری کو صرف پیسے کمانے کے ذریعے میں تبدیل کر دیا ہے۔ ہم نے لوگوں کو پڑھنا تو سکھا دیا، لیکن سوچنا نہیں سکھایا۔ یہی وجہ ہے کہ آپ کو اعلی ڈگریوں والے افراد کے رویوں میں شدید تعصب، تنگ نظری اور جہالت نظر آئے گی، جبکہ کسی ان پڑھ یا کم پڑھے لکھے کے پاس آپ کو وسعت ظرف اور انسانیت مل جائے گی۔ ڈگری انسان کو گفتگو کا طریقہ تو سکھا سکتی ہے، لیکن لہجے کی نرمی اور دوسروں کی رائے کا احترام صرف اندرونی شعور سے آتا ہے۔ جب علم کا مقصد صرف پیسہ اور عہدہ بن جائے، تو معاشرہ دانشوروں سے نہیں، بلکہ پڑھے لکھے جاہلوں سے بھر جاتا ہے۔

خاک زادہ

معاشرے میں لوگ اکثر دوسروں کی عزت اس لیے نہیں کرتے کہ وہ ان کے اخلاق سے متاثر ہوتے ہیں، بلکہ اس لیے کرتے ہیں کہ وہ ان کے عہدے، طاقت یا دولت سے ڈر سا رکھتے ہیں۔ انسان کی حقیقی فطرت کا امتحان تب ہوتا ہے جب اسے کسی ایسے شخص پر مکمل اختیار مل جائے جو اس کا کچھ نہیں بگاڑ سکتاہو جیسے کوئی ملازم، کوئی غریب رشتہ دار یا کوئی لاچار انسان۔ تب انسان کے اندر کا فرعون باہر آتا ہے۔ ہم اپنے سے زیادہ حیثیت رکھنے والے کے سامنے بچھ جاتے ہیں اور اپنے سے کم حیثیت رکھنے والے کی عزت کو تار تار کرنے میں ذرا بھی ہچکچاہٹ محسوس نہیں کرتے۔ یہ دوہرا رویہ ثابت کرتا ہے کہ ہماری تمیز اور اخلاق اندرونی تربیت کا حصہ نہیں، بلکہ محض طاقت کا خوف ہے۔

خاک زادہ

ہم میں سے اکثر لوگ ماضی کی تلخ یادوں، دوسروں کی زیادتیوں کو سالوں تک اپنے ساتھ لیے گھومتے ہیں۔ کوئی ایک بات یا ایک واقعہ جو اذیت ناک ہو ہمارے ذہن میں گھر کر جاتا ہے اور ہم بار بار اس دکھ کو نہ چاہتے ہوئے بھی یاد کر بیٹھتے ہیں۔ ہم سمجھتے ہیں کہ سامنے والے کو معاف نہ کر کے ہم اسے کوئی سزا دے رہے ہیں، جبکہ حقیقت یہ ہے کہ اس اذیت کا بوجھ صرف ہم خود اٹھا رہے ہوتے ہیں۔معاشرے کے لحاظ سے معاف کرنے والے کو اکثر کمزور سمجھا جاتا ہے۔ لوگ سوچتے ہیں کہ اگر درگزر کر دیا تو شاید دوسرا انسان ہم سے زیادہ طاقت ور نظر آئے گا۔ لیکن حقیقت میں معاف کر دینا دوسرے کے لیے نہیں بلکہ اپنے اندر کے سکون کے لیے ضروری ہوتا ہےجب ہم کسی کو معاف کرتے ہیں، تو ہم اپنے آپ کو اس ذہنی اذیت یا قید سے آزاد کر دیتے ہیں۔ جو انسان درگزر کرنا سیکھ جاتا ہے، اس کا دل بڑا ہو جاتا ہے اور اس کے رویے میں ایک عجیب سا اطمینان اور ٹھہراؤ آ جاتا ہے۔

خاک زادہ

ہماری سب سے بڑی معاشرے کے لحاظ سے کمزوری شاید یہ ہے کہ ہم سمجھنے سے پہلے فیصلہ کر لیتے ہیں۔ کسی نے جواب نہیں دیا تو ہم نے اسے بدتمیز کہہ دیا، کسی نے ملاقات سے انکار کیا تو اسے مغرور سمجھ لیا اور کسی نے تعلق میں فاصلے پیدا کیے تو اسے بے حس قرار دے دیا۔ ہمیں یہ جاننے کی ضرورت کبھی محسوس ہی نہیں کی کہ شاید اس شخص کے پاس کوئی ایسی وجہ ہو جس کا ہمیں علم نہیں۔اس شخص کے کسی کے ایک رویے کو اس کی پوری شخصیت بنا دینا انصاف نہیں۔ انسان حالات کے ساتھ بدلتا ہے، کبھی اپنی مرضی سے اور کبھی مجبوری میں۔ اس لیے کسی کے بارے میں رائے قائم کرنے سے پہلے اپنی سوچ کو اس قدر وسیع کر لیں کہ جو رائے قائم کی گئی ہے اس میں حقیقت کتنی ہے؟، تو شاید بہت سے رشتے ٹوٹنے سے بچ جائیں۔

خاک ذادہ

زندگی میں کچھ لوگ ہم سے دور ہو جاتے ہیں اور ہم فوراً یہ سمجھ لیتے ہیں کہ شاید ان کے دل میں ہمارے لیے پہلے جیسی محبت نہیں رہی۔ مگر ہر فاصلہ نفرت کی وجہ سے نہیں ہوتا۔ کبھی انسان اپنی ذمہ داریوں میں الجھ جاتا ہے، کبھی ذہنی تھکن اسے لوگوں سے دور کر دیتی ہے اور کبھی وہ اپنے اندر کی کسی جنگ میں اس قدر مصروف ہوتا ہے کہ کسی سے بات کرنے کی خواہش بھی باقی نہیں رہتی۔ کچھ فاصلے تعلق ختم نہیں کرتے، صرف انسان کو کچھ وقت کے لیے اپنے اندر واپس لے جاتے ہیں۔ مسئلہ یہ ہے کہ ہم خاموشی کو ہمیشہ بے رخی سمجھ لیتے ہیں۔ شاید بعض رشتوں کو ختم ہونے سے زیادہ سمجھنے کی ضرورت ہوتی ہے۔

خاک زادہ

ہم انسانوں کو اکثر ان کے لباس، گفتگو، مسکراہٹ اور ظاہری رویے سے پہچاننے کی کوشش کرتے ہیں، لیکن حقیقت یہ ہے کہ انسان کی اصل شخصیت ان چیزوں سے کہیں زیادہ گہری ہوتی ہے۔ جو شخص ہر وقت مسکراتا دکھائی دیتا ہے، ضروری نہیں کہ وہ اندر سے بھی خوش ہو، اور جو شخص خاموش رہتا ہے ضروری نہیں کہ اس کے دل میں احساسات نہیں۔ ہر انسان اپنے اندر ایک ایسی دنیا لیے پھرتا ہے جس سے دوسرے لوگ مکمل طور پر واقف نہیں ہوتے۔ اسی لیے کسی کو صرف اس بنیاد پر سمجھ لینا کہ وہ ہمیں جیسا دکھائی دے رہا ہے، اکثر وہ اندازہ ہماری غلطی بن جاتا ہے۔ انسان کو جاننے کے لیے اس کے ظاہری رویے سے آگے دیکھنا پڑتا ہے، اور شاید یہی وہ چیز ہے جس کی ہمارے معاشرے میں سب سے زیادہ کمی ہے۔

خاک زادہ

ہمارے معاشرے میں ایک عادت بہت تیزی سے پھیل رہی ہے، اور وہ ہے دوسروں میں نقص نکالنا۔ ہم اکثر یہ سوچ کر دوسروں کی ذات، ان کے لباس، ان کے کام یا ان کے فیصلوں پر جملے کس دیتے ہیں کہ ہم صرف “اصلاح” کر رہے ہیں۔ لیکن سچ یہ ہے کہ نیت چاہے کچھ بھی ہو، اگر لہجہ اور الفاظ تلخ ہوں تو وہ اصلاح نہیں بلکہ دل آزاری بن جاتی ہے۔​انسانی رویوں کا یہ ایک بڑا مسئلہ ہے کہ ہم دوسروں سے کامل ہونے کی توقع رکھتے ہیں جبکہ خود غلطیوں کا پتلا ہوتے ہیں۔ تنقید اگر تعمیراتی ہو اور اکیلے میں پیار سے کی جائے تو وہ انسان کی شخصیت کو سنوارتی ہے۔ لیکن جب وہی بات سب کے سامنے، طنز اور تحقیر کے انداز میں کی جائے تو وہ اگلے انسان کے اندر نفرت اور ضد پیدا کر دیتی ہے۔​اگر ہم اپنے رویے میں تھوڑی سی نرمی لے آئیں اور بولنے سے پہلے صرف یہ سوچ لیں کہ “اگر یہی الفاظ مجھے کہے جاتے تو مجھے کیسا لگتا؟”، تو سالوں پرانے تعلقات ٹوٹنے سے بچا سکتے ہیں۔

انسان کی ایک عجیب عادت ہے کہ وہ دوسروں کے رویوں کو چند لمحوں میں سمجھ لینے کا دعویٰ کر لیتا ہے، مگر ان رویوں کے پیچھے چھپے ہوئے حالات کے بارے میں جاننے کی کوشش ہی نہیں کرتا۔ کوئی شخص اگر خاموش طبعیت کا ہو تو ہم اسے مغرور سمجھ لیتے ہیں، کوئی زیادہ باتونی ہو تو اسے دکھاوا یا بناوٹی کہہ دیتے ہیں، کوئی ہم سے دور رہنے چاہیے تو اسے بے وفائی کے زمرے میں لے آتے ہیں۔ ہمیں اس بات میں دلچسپی ہوتی ہے کہ سامنے والا ہمیں کیسا دکھائی دے رہا ہے،لیکن اس بات سے کم کہ وہ اندر سے کن حالات سے گزر رہا ہے۔شاید اسی چیز نے ہمارے معاشرے میں بہت سے ایسے فاصلے پیدا کیے ہیں جو کبھی پیدا ہی نہیں ہونے چاہیے تھے۔ ہم لوگوں کے ایک لمحے کو دیکھ کر ان کی پوری شخصیت کا فیصلہ کر دیتے ہیں۔ کسی کے چہرے پر مسکراہٹ دیکھ کر سمجھ لیتے ہیں کہ وہ خوش ہے، اور کسی کی خاموشی دیکھ کر فیصلہ کر لیتے ہیں کہ اسے کسی کی پروا نہیں۔ حالانکہ انسان کے اندر چلنے والی جنگ ہمیشہ چہرے پر نظر نہیں آتی۔کسی کو سمجھنے کے لیے صرف اس کے الفاظ سننا کافی نہیں ہوتا، کبھی کبھی اس کی خاموشی بھی سننی پڑتی ہے۔ ہر بدلا ہوا رویہBad intention نہیں ہوتا، ہر فاصلے کے پیچھے نفرت نہیں ہوتی اور ہر خاموش شخص بے حس نہیں ہوتا۔ بعض اوقات انسان اندر سے اور حالات کے پیش نظر اتنا تھک چکا ہوتا ہے کہ وضاحت کرنے کی طاقت نہیں رہتی۔ شاید ہمیں دوسروں کے بارے میں فیصلے سنانے سے پہلے ایک لمحے کے لیے یہ سوچ لینا چاہیے کہ اگر ہم اس شخص کی جگہ ہوتے تو کیا ہم بھی بالکل ایسے ہی نہ ہوتے؟

جسمانی یا ذہنی معذوری انسان کی زندگی میں کافی مشکل پیدا کر سکتی ہے، مگر دل کی معذوری اس سے کہیں زیادہ خطرناک ہے۔ وہ شخص جو دوسروں کا درد دیکھ کر بھی بے حس رہے، کسی کمزور کی عزت کو پامال کر کے بھی مطمئن رہے، کسی کے آنسوؤں کو تماشا سمجھے اور کسی کی مجبوری سے فائدہ اٹھائے ، وہ انسان بظاہر تو مکمل نظر آتے ہیں لیکن وہ اندر سے بہت محروم ہوتے ہیں۔ جسم کی کمی انسان کو محتاج بنا سکتی ہے، مگر احساس کی کمی انسان کو انسان ہونے سے محروم کر دیتی ہے۔

سب سے خطرناک منافقت وہ ہے جس میں انسان خود کو منافق سمجھتا ہی نہیں۔ وہ اپنے ہر مفاد کو اصول، اپنی ہر زیادتی کو مجبوری، اپنی ہر سختی کو اپنا حق اور دوسروں کی ہر خامی کو دوسروں کا کردار سمجھتا ہے۔ اسے اپنے رویے میں کوئی خرابی دکھائی نہیں دیتی، کیونکہ اس نے اپنے لیے ہمیشہ ایک الگ ترازو رکھا ہوتا ہے۔ ہم دوسروں سے وہ اخلاق چاہتے ہیں جن پر خود عمل کرنے کو تیار ہی نہیں۔ انسان کا سب سے مشکل احتساب دوسروں کا نہیں، اپنے آپ کا احتساب ہے۔

معاشرے کی ایک تلخ حقیقت یہ ہے کہ کچھ لوگ اپنی کمزوریوں اور ناکامیوں کو چھپانے کے لیے دوسروں کو نیچا دکھاتے ہیں۔ جو انسان خود اپنے اندر سے مطمئن نہیں ہوتا، وہ اکثر دوسروں کی غلطیاں تلاش کرتا ہے، ان کا مذاق اڑاتا ہے اور انہیں کمتر ثابت کرنے کی کوشش کرتا ہے۔ ایسے لوگوں کو اس وقت سکون ملتا ہے جب وہ کسی دوسرے کو اپنے سے کم تر دیکھتے ہیں، کیونکہ اس سے انہیں خود کو بہتر سمجھنے کا احساس ہوتا ہے۔ حقیقت یہ ہے کہ ان کا مقصد کسی کی اصلاح کرنا نہیں ہوتا، بلکہ صرف یہ ثابت کرنا ہوتا ہے کہ میں تم سے بہتر ہوں

خاک زادہ

انسان کی اصلیت تب سامنے نہیں آتی جب وہ آپ سے فائدہ حاصل کر رہا ہو، بلکہ تب ظاہر ہوتی ہے جب اسے آپ سے مزید کسی فائدے کی امید نہیں رہتی۔ لوگ اکثر رشتوں کو احساس یا محبت کی بنیاد پر نہیں، بلکہ اپنی ضرورت اور سہولت کے حساب سے قائم رکھتے ہیں۔ جب تک آپ ان کے کام آتے رہیں گے، آپ کی خامیاں بھی ان کی نظر میں ہنر لگیں گی، اور جس دن آپ ان کی توقعات پر پورا اترنا بند کر دیں گے، اسی دن آپ کی تمام اچھائیوں پر ایک ہی لکیر کھینچ دی جائے گی۔ انسان کا رویہ موسم کی طرح نہیں بدلتا، بلکہ اس کی ضرورت کے تحت بدلتا ہے۔

خاک ذادہ

جب ہر تعلق میں یہ حساب رکھا جانے لگے کہ میں نے اس کے لیے اتنا کیا، اس نے میرے لیے کیا کیا؟ تو رشتہ آہستہ آہستہ محبت اور احساس سے نکل کر لین دین بن جاتا ہے۔ خلوص کی اچھائی یہی ہے کہ وہ رسید نہیں مانگتی ۔ لیکن اس کا مطلب یہ بھی نہیں کہ انسان مسلسل یک طرفہ تعلقات میں خود کو ختم کرتا رہے۔ فرق صرف اتنا ہے کہ محبت میں حساب نہیں ہوتا، مگر شعور ضرور ہوتا ہے۔ انسان کو یہ سمجھنا چاہیے کہ کہاں اس کا خلوص کی قدر ہو رہی ہے اور کہاں اس کی نرمی سے فائدہ اٹھایا جا رہا ہے ۔

​کسی معذور یا مجبور انسان کی مجبوری سے اپنا فائدہ اٹھانا اخلاق کی خرابی تو ہے ہی، لیکن سچ پوچھیں تو یہ انسان کہلانے کے قابل بھی نہیں چھوڑتا۔ جب کوئی اگلا بندہ آگے سے کمزور پڑ جائے، تو اس پر اپنی زبردستی دکھانا کوئی ہیرو پن یا بہادری نہیں ہے۔ اصل بڑا دل اور ظرف تو یہ ہے کہ جب آپ کے پاس کسی کو گرانے کا پورا موقع ہو، تب بھی آپ اس کا ہاتھ پکڑ کر اسے سنبھال لیں۔​دنیا میں پاور والے لوگ تو بہت مل جاتے ہیں، لیکن ایسے لوگ بہت کم ہیں جو طاقت رکھتے ہوئے بھی دل میں نرمی رکھیں۔ انسان اصل میں کیا ہے، یہ اس وقت پتہ نہیں چلتا جب اس کے ہاتھ میں کچھ نہ ہو انسان کی اصلیت تو تب سامنے آتی ہے جب اس کے پاس پورا بس اور اختیار ہو اور سامنے والا بندہ اس کی مدد کا محتاج ہو۔

معاشرے میں اکثر لوگ کسی کی خاموشی کو اس کی کمزوری یا کم عقلی سمجھ لیتے ہیں، حالانکہ ایسا بالکل نہیں ہوتا۔ انسان ہمیشہ بلاوجہ خاموش نہیں ہوتا۔ بعض اوقات انسان کے اندر دکھوں کا ایسا طوفان ہوتا ہے جسے بیان کرنے کے لیے الفاظ چھوٹے پڑ جاتے ہیں، اور وہ خاموشی کا سہارا لے لیتا ہے۔کسی کے صبر اور اس کی خاموشی کا مذاق اڑانا انسان کی اپنی اخلاقی گراوٹ کو ظاہر کرتا ہے۔ ہم نہیں جانتے کہ سامنے والا انسان اپنی زندگی میں کس ذہنی اذیت یا دور سے گزر رہا ہے۔ ہو سکتا ہے کہ اس کی خاموشی اس کا اپنے رب پر توکل ہو، یا پھر وہ رشتوں کے بھرم کو بچانے کے لیے چپ چاپ سب کچھ سہہ رہا ہو۔ہمیں چاہیے کہ معاشرے میں لوگوں کے رویوں کو باریکی سے سمجھیں۔ کسی کی خاموشی پر طنز کرنے کے بجائے اس کے دکھ کو بانٹنے کی کوشش کرنی چاہیے۔ اگر ہم کسی کی تکلیف کو کم نہیں کر سکتے، تو کم از کم اپنے الفاظ کے تیروں سے اس کے دل کو مزید زخمی تو نہ کریں۔ آخر میں انسان اپنے الفاظ سے نہیں، بلکہ دوسروں کے ساتھ روا رکھے جانے والے رویوں سے ہی پہچانا جاتا ہے

وقت گزر جاتا ہے، چہرے بدل جاتے ہیں، عہدے ختم ہو جاتے ہیں، دولت آتی جاتی رہتی ہے، مگر انسان کے رویّے لوگوں کی یاد میں باقی رہتے ہیں۔ کسی کو یہ یاد نہیں رہتا کہ آپ کے پاس کتنی چیزیں تھیں، لیکن یہ ضرور یاد رہ سکتا ہے کہ آپ نے اُس کے کمزور وقت میں اُس کے ساتھ کیا سلوک کیا تھا۔ آپ نے کسی کی عزت بچائی تھی یا مجمعے میں اُسے رسوا کیا تھا؛ کسی کی مدد کی تھی یا اُس کی مجبوری سے فائدہ اٹھایا تھا۔ آخرکار انسان اپنی چیزوں سے نہیں، اپنےپیچھے چھوڑے ہوئے احساس سے پہچانا جاتا ہے